મહિલા હવલદારે શોધી કાઢ્યા 76 ગુમ થયેલા બાળકો, ખુશ થઈને દિલ્લી પોલીસે લીધો આ નિર્ણય.

0
241

લેડી જેમ્સ બોન્ડ છે આ મહિલા હવલદાર, શોધી કાઢ્યા ગુમ થયેલા 76 બાળકો, જાણો તેમના વિષે વિસ્તારથી. દિલ્લી પોલીસની હવાલદાર સીમા ઢાકાની કામગીરીને જોતા તેમને પ્રમોશન આપવામાં આવ્યું છે અને એએસઆઈ બનાવવામાં આવ્યા છે. સીમા ઢાકા દિલ્લી પોલીસની પહેલી એવી પોલીસ કર્મચારી બની છે, જેમને ગુમ થયેલા બાળકોને શોધવા બદલ આઉટ ઓફ ટર્ન પ્રમોશન આપવામાં આવ્યું છે.

દિલ્લી પોલીસના જણાવ્યા અનુસાર, સીમા ઢાકાએ અઢી મહિનામાં એટલે કે 75 દિવસમાં 76 ગુમ થયેલા બાળકોને શોધી કાઢ્યા છે, અને તે બાળકોને તેમના પરિવારો સોંપ્યા છે. સીમાના આ કામથી ખુશ થઈને પોલીસ કમિશનર એસ.એન. શ્રીવાસ્તવે તેમને વારો આવતા પહેલા એટલે કે આઉટ ઓફ ટર્ન પ્રમોશન આપ્યું છે.

વારો આવતા પહેલા પ્રમોશન મેળવીને હવલદારમાંથી એએસઆઈ બનેલી સીમા ઢાકા ઘણી ખુશ છે, અને પોલીસ વિભાગમાં દરેક વ્યક્તિ તેમની પ્રશંસા કરી રહ્યા છે. આ વિશે માહિતી આપતાં દિલ્લી પોલીસના પ્રવક્તા ડો. ઈશ સિંઘલે જણાવ્યું કે, દિલ્લી પોલીસ કમિશનરે 5 ઓગસ્ટના રોજ આ જાહેરાત કરી હતી કે, જે પોલીસ કર્મચારીઓ ગુમ થયેલ બાળકોને શોધી કાઢશે તેમને વારા પહેલા પ્રમોશન અને અસાધારણ કાર્ય પુરસ્કાર આપવામાં આવશે.

cp delhi’s tweet screen shot

જાહેરાત અનુસાર, જે સિપાહી અને હવલદાર એક વર્ષમાં 14 વર્ષથી ઓછી ઉંમરના 50 અથવા તેનાથી વધુ ગુમ થયેલા બાળકોને શોધી કાઢશે, તેમને વારો આવતા પહેલા પ્રમોશન આપવામાં આવશે. જે સિપાહી અને હવલદાર ઓછામાં ઓછા 15 બાળકો શોધશે તેમને અસાધારણ કાર્ય પુરસ્કાર આપવામાં આવશે. આ જાહેરાત પછી ઘણા પોલીસ કર્મચારીઓ બાળકોની શોધમાં લાગી ગયા હતા.

સમયપુર બાદલી પોલીસ સ્ટેશનમાં ફરજ બજાવનાર મહિલા કોન્સ્ટેબલ સીમા ઢાકાએ માત્ર અઢી મહિનામાં 76 ગુમ થયેલા બાળકો શોધી કાઢ્યા. જેમાંથી 56 બાળકોની ઉંમર 14 વર્ષથી ઓછી છે. હવલદાર સીમા ઢાકાએ જે ગુમ થયેલા બાળકો શોધ્યા છે તે વિવિધ પોલીસ સ્ટેશન વિસ્તારમાંથી ગુમ થયા હતા. સીમા ઢાકાએ દિલ્લીમાંથી ગુમ થયેલા બાળકો સિવાય પંજાબ અને પશ્ચિમ બંગાળમાંથી ગુમ થયેલા બાળકોને પણ શોધ્યા છે.

દિલ્લી પોલીસે ઓગસ્ટથી લઈને અત્યાર સુધી 1440 ગુમ થયેલા બાળકો શોધી કાઢ્યા છે. દિલ્લી પોલીસના જણાવ્યા અનુસાર, આ પહેલ દ્વારા વધુમાં વધુ ગુમ થયેલા બાળકો શોધવામાં આવ્યા છે, અને તેમના પરિવારને સોંપવામાં આવ્યા છે. તેમજ આ રીતે વારો આવતા પહેલાં પ્રમોશન મળવા પર અન્ય પોલીસકર્મીઓમાં ઉત્સાહ વધ્યો છે, અને ગુમ થયેલા બાળકો શોધવામાં આવી રહ્યા છે.

આ માહિતી ઇન્ડિયાફીડ્સ અને અન્ય નેશનલ ન્યુઝ એજન્સીઓના ન્યુઝ આર્ટિકલ માંથી સંપાદન કરી લીધેલ છે.